INVESTIGANDO AL RODIU LOS TRES GOCHINOS

Nes nuestres aules tamos trabayando col cuentu los 3 gochinos y al traviés d´ello afondamos nel oxetivu de conocimientu del entornu nos cursos d´educación infantil.

Una de les actividaes llevaes a cabu ta rellacionada cola investigación sol casu acorríu na viesca del cuentu.¿Quién echó abaxo les cases? ¿Qué yos paso a los gochinos? ¿Qué foi del llobu feroz? Entrugues a les que vamos dar rempuesta col sofitu de les siguientes xeres.

1º Cuentacuentos del llibru "Los tres gochinos" por parte del alumnáu de sestu cursu. Llibru que estos escolinos mayores tornaran enantes.

Les maestres decoramos la clas a mou de viesca con dellos murales en papel contínuu y con fueyes y palos pol suelu. Tamién ambientamos con música clásica pa facelo más prestoso.

2º Na segunda sesión, sola nuesa investigación, afondamos na vida de los gochos, los sos alimentos favoritos, el mou de vida, la so vivienda y finamos baillando al son del canciu "Ea Ea" del discu Bestiariu, por ser una de les canciones favorites de los nuesos gochinos.

3º Nesta tercera sesión vamos investigar y manipular los diferentes materiales de los que tan feches les casines de los gochos del cuentu: Paya, madera y ladriellu. 

Al llegar a aula atopamos una pista que nos unvía al patiu pa siguir investigando, saldremos coles lupes, los gorros de detectives, mapas, lentes de larga visión, mochiles y llapiceros, p´anotar too aquello que mos resulte extraño y guardar tolo que vayamos atopando. Coles  diferentes pistes, diremos alcontrando dellos materiales (ladriellos de Lego, paya orixinal y palinos depresores) colos que finalmente y siguiendo les instrucciones, caún construirá la so casina.

4º N´esta sesión, trabayaremos dalgunes praxies bucofaciales asina como dalgunes onmatopeyes  col sofitu deles imáxenes del cuentu. Investigaremos con distintos materiales si vuelan o no col nuesu soplíu y finalmente fadremos la prueba coles nueses cases. "Soplaré soplaré y soplaré y la to casa baltaré"

5º Tras comprobar nes anteriores sesiones que les cases nun son tan fáciles de tirar abaxo, xúrdenos la dulda di si foi el llobu el malu del cuentu o non lo foi. Asina que....ponémonos a investigar nel ordenador del aula, cola ayuda de la maestra, y atopamos una noticia (ya preparada) na que diz "LES COSES NUN SON LO QUE PAECEN, EL LLOBU NUN YE´L CULPABLE" 

Y nestes investigaciones atopamos un diariu que´l llobu escribió dende la cárcel. Diariu que la maestra traerá na prósima sesión pa seguir afondando nesti casu tan estrañu.

Cristina González Vázquez. C.P. Santa Bárbara, Oyancu y Alba Hernandez Boada C.P. Santa Eulalia, Uxo.